UKA 2001/31

 

Nassuiaatit nalinginnaasut

Usit imaatigut assartorneqartut Kalaallit Nunaannut, Kalaallit Nunaannit imaluunniit Kalaallit Nunaanni namminermi assartorneqarnerat apeqqutaatillugu assartuinermi akiligassat akileqquneqartut procentianik aalajangersimasumik akitsuusiussap Inatsisartunit assigiinngiiaartumik aalajangiiffigineqarsinnaanissaata tunngavissiuunneqarnissaa peqqussutissatut siunnersuutikkut siunertarineqarpoq.

Procenti aalajangersimasoq akitsuusiussaq Inatsisartut aningaasanut inatsisaanni ukiumoortumi oqaasertaliussani Inatsisartunit aalajangersarneqartarpoq.

Siunnersuut allaffissornikkut ingerlatsinermut kingunerisaqassanngilaq.

 

Aalajangersakkanut ataasiakkaanut nassuiaatit

 

§ 1-imut

Usit imaatigut assartorneqartut Kalaallit Nunaannut, Kalaallit Nunaannit imaluunniit Kalaallit Nunaanni namminermi assartorneqarnerat apeqqutaatillugu assartorneqarnerinut akiligassat akileqquneqartut procentianik aalajangersimasumik akitsuusiussap assigiinngiiaarsinnissaanut Inatsisartut periarfissinneqarnissaat siunnersuutigineqarpoq. Aalajangersakkakkuttaaq Inatsisartut periarfissinneqarput pineqartut taakku arlaata ilaasaluunniit akitsuutaata 0-imut aalajangersarnissaanut.

Akitsuutip akileqquneqartup Kalaallit Nunaanni sumiiffinnut allanut assartuussisarnermi aningaasartuutaasartunut matusissutissaanissaanik aalajangersakkap atorunnaarsinneqarnissaa peqatigitillugu siunnersuutigineqarpoq, tassami akitsuutitigut Nunatta karsiata isertittagaasa ilaasa siunertanut aalajangersimasunut atugassanngortinneqarnissaat pitsaasuusorineqanngimmat.

 

§ 2-mut

Inatsisartut peqqussutissaattut siunnersuutip 15. november 2001-imi atortuulernissaa 1. januar 2002-miillu sunniuteqalernissaa siunnersuutigineqarpoq taamaalilluni assartorneqartut assartornerinut akiliutissatut akileqquneqartut ullormi tassanngaaniit atuuffigissallugit.